الرئيسية > الكترونيات > سوني اريكسون والا الصيني ؟؟

سوني اريكسون والا الصيني ؟؟

نوفمبر 9, 2009 أضف تعليق Go to comments

انا قصة حياتي مع الاكترونيات دايما مأساوية ليه مدري .. وراح احكيلكم قصة جوالي الحبيب

وراح اقلكم انه مشكله من جد لما الواحد يتعلق عاطفيا في اشياءة .. احنا ما تخارجنا مع البشر ما بالكم بالاشياء

اشتريت جهاز سوني اريكسون K850i  من مدة طويلة

الحاصل اني طلعت مع قروب المركز الصيفي اللي كنا فيه انا و بيونة لرحلة بحرية عالبوت  لمدة ساعتين ..

وكنت اصور  بجوالي فديو وكنت عالطرف .. وجات موجة قوية طرطشت عالجوال تغرق موية صار يقطر على طول نزلت منه البطاريه .. الين هنا تصرف حكيم عقلاني .. واحنا راجعين كان قلبي يعورني عشانه ..

قمت رجعت فتحته .. تصرف عاطفي درجة اولى ..

وغلط لاني فتحته بدون حتى ما احاول انشفة كنت بس ابغى اتاكد انه لسا فيه روح ..

وطلع فيه روح يا اني فرحت فرح .. بعدها بدأت افكك البطاريه والشريحة والذاكرة عنه لقيتها غرقاااانة ..

وبدا يمشي الخراب فيه شويه شويه والسبب اني فتحته وهو مبلل .. ونصيحه يا جماعة ما ينفتح الجوال وينحط فيه البطاريه اذا تعرض للمويه الا بعد ما ينشف تماما

بعدها سكت .. السكته القلبية اللي تخليك انت بتسكت معاه سكته كلامية وصدمة عصبية ..

واشتريت بطاريه جديدة بعد اسبوعين تقريبا وصلح الحمد لله والارض صارت مي واسعتني ..

لكن فيه شويه خراب مع الوقت اختفى وكأنه ما جاته ولا قطره مويه .. في يوم مشؤوم برضو خرب والخراب من البطاريه لاني لما اشبكه عالشاحن يولع لمبة حمرا رجعت اشتريت بطاريه جديدة ورحت حكيت اللي صار في منتدى سوني اريكسون وواحد قال انه خراب البطاريه الثانيه ان الجوال داخله رطووووووبة ..

واحتمال اذا ما دخلته الصيانة بيخرب البطاريه الجديدة .. وطبعا بحكم خبرتي المأساويه في الالكترونيات ..

اخذتها قاعدة اي شي يدخل الصيانة ما يطلع زي ماكان .. مهما ايش صار يدخل ويطلع اوك وتمام بس يبدأ يمشي فيه الخراب وتضطر ترجعه .. وهذيك الفترة ما خليت موضوع في الانترنت عن هالجوال ما فتحته كانت فيه اشياء حلوة ونصايح وخطوات تصليح انت تقدر تسويها بنفسك ..

وانا من باب اخدم نفسك بنفسك ماشيه على هالطريقة .. وترى القاعدة هذي تمشي حتى عالسيارات واسألوا مجربيين .. وما يدخل شي في الصيانة الا وتعرف انه قربت نهايته

وكان عندي خيارين .. يا اني بالفلوس اللي معايا محددتها للجوال ادخله صيانه .. او اني اشتري واحد يمشي حاله الين يفرجها ربنا .. سألت عن الصيانة وطريقة الصيانه والمحلات ولسا قلبي مو مطمن ..

قلت خلاص اشتري جوال اي كلام مضطرة .. مع العلم ان جوالي صالح وكل شي بس عشان الرطوبه فيه قفلته ونزلت منه البطارية خايفة عليه يرجع يخرب ..

ورحت ذاك اليوم اللي داعية فيه امي ليا يارب يخليها ويلهمها تدعيلي كل يوم يارب .. كنت ابغى اقضي للجامعة ومرينا على الجامعة مول اللي ورا الجامعة بلازا وقدام جامعة الملك عبد العزيز .. وصادف اني لقيت محل جوالات .. دخلته اسأل عن شي معين واطلع لكن عرض الجوالات كان مغري ..

وانا قلبي يعورني اذا شفت انواع الجوالات اتنح عندها واجلس اسأل عنها وفعلا جلست اسأل مع ان المحل صغير وكان زحمة شويتين بس صاحب المحل كان فعلا شخص يقدر زباينه مع ان واضح اننا جايين بس نتفرج ..

وترى هالشي ما تلقاه عند الكل خاصة بعض الاشخاص ما عندهم قدرة التركيز على عدة اشياء وفي نفس الوقت يكون صبور وذكي ويوفق بين الكل ..

شفت جهاز كأنه اي بود اختي قالت ايش رايك فيه قمت قلتله طلع هذا الاي بود وقال انه اي بود + جوال ..

عجبتني الحركة طلعه وشغله لنا واعطانا هوا وراح يخدم زباين ثانين .. وجلسنا حوالي خمس دقايق اعطانا تقريبا جهازين متخلفة في الاشكال انا لفتني اكثر هالجهاز والاي بود قلت مرة ينفع للجامعة وكذا بس كانت عندي مشكله السعر لو انها عالية راح استغني عن اشياء ثانيه للجامعة حاطتها في بالي ..

بس اشتريته وطبعا هو جوال صيني اخليكم مع الصور وراح اذكرلكم مميزاته باللي افهم فيه  وبعيد اقلكم سعره

11

22

33

44

هنا مبين الشريحتين لما ادخل الشريحتين يبين اسم الشبكة

5

هنا صورتها بس عشان الانوار هذي عاجبتني .. لما يقفل الغطى الانوار تعمل دائرة وكمان له صوت لما تقفل الغطى وممكن تكتمه وتقفل الشاشه عشانها باللمس في طريقتين اقدر افتحها فيها يا انه اسحب سهم احمر طالع في الشاشه وتفتح معايا او اضغط مكان زر الكاميرا على جنب جهه اليمين وتفتح معايا الشاشه والاي بود كمان طبعا الاي بود لمس برضو يعني الانوار اللي على شكل دائرة هذي مكتوب عندها قوائم الاي بود تشتغل باللمس

66

هنا القلم اللي اقدر اتحدك بالشاشه منه واكتب الماسجات واتصفح كله وطبعا اقدر اشتغل عليه بدون هالقلم

77

88

هذي السماعات للاي بود وللاتصال وللراديو وكله

99

وهنا بعد ما زينته وكشخته ومنها اغطي مكان الكاميرا عشان ممنوع جوالات الكاميرا في الجامعة

احلى شي فيه انه يدخل شريحتين في نفس الوقت

وله ذاكرة خارجيه اشتريتله 2 قيقا

فيه كاميرا مرة بسيطة وبلوتوث وراديو والشاشة كلها لمس والاي بود برضو لمس  زي ما قلتلكم

معاه فيش شاحن وسلك ينشبك فيه وفي نفس الوقت هالسلك هو وصله من الجهاز للكمبيوتر على طول تطلع ذاكرة الهاتف وذاكرة الجهاز من ضمن اجهزة الكمبيوتر ما تحتاج تعاريف ولا برامج ولا شي

في شي زايد كمان انه فيه مغير اصوات صوت مرأة صوت رجل صوت طفل واصوات ثانيه .. وكمان فيه خلفيات صوت يعني اذا انا في هدوء واحد اتصل ابغى اصرفه احط صوت زحمة مطعم والا صوت رصيف وسيارات واصوات ثانيه كثيرة .. فيه خاصية تسجيل المكالمة بدون صفارة التنبيه

هذي اهم مميزاته

الجهاز اذا نزلت منه الشريحتين يشتغل بدون شرايح وتقدر تشتغل عليه بس اي بود واذا دخلت الشريحتين تجي الاتصالات عالشريحتين وكلها تكون شغاله  واذا جاك اتصال يجيك جنب الاسم تحديد هل هذا الاتصال من الشريحة الاولى او الثانية .. كمان لما تعمل اتصال تضغط الاخضر وتحدد تبغى الاتصال من اي شريحة ..

سعر هالجوال بـ 280 ريال  .. طبعا انا انصدمت هذي المواصفات كلها وبهذا السعر .. حتى لو صيني سعره مرة مو معقول .. اشتريته بدون تردد

وانا كنت ناويه اشتري جهاز نوكيا ابو لمبة وشاشة اصفر واسود بـ 150 تقريبا

فرق ميه ريال او اكثر بقليل حسيت انه هالصيني يستاهل ..

بعض ناس قالولي اعطيه عمر افتراضي شهر ومعاك انتي بالذات اسبوعين ههههه

قلت انا اعطيته عمر افتراضي اسبوع

الان تقريبا كمل معايا اربع اسابيع ما صار فيه ولا شي .. ولا تكه .. وانا اكرفه في الجامعة كل يوم واسمع فيه وكل شي

طبعا المحل فيه قطع الغيار اذا خرب فيه شي يقومون بتصليحه سماعات داخليه ويبيع سماعات خارجيه وشاحن واغلب مستلزماته الاساسية طبعا الجهاز اشتريته بدون ضمان يعني اصلحه على حسابي ..

ولما وريته وحدة من البنات قالت احنا من متى نستفيد من الضمان لما استرجعت ماضيا الاليم في الاجهزة .. عمري في حياتي ما استخدمت ضمان جهاز وما يخرب الا بعد الضمان ولو بيوم واحد كأنهم حاسبينها حساب لا اله الا الله ..

ومبسوطة بالجوال واقول لاختي ترى هالاجهزة عندي زي الزوجة الاولى والزوجة الثانيه .. الاولى هي الاساس وهي الغاليه ومالي غنى عنها ( k850) والزوجة الثانيه انبهر فيها الايام الاولى واجلس مبسوطة فيها مدة بعدين مصيري ارجع للزوجة الاولى وتبان عيوب الزوجة الثانيه بي المشكله هنا وين .. اني قد اني خلقة متعلقة عاطفيا مع زوجتي الاولى بدأت تدريجيا احب زوجتي الثانيه .. لما فكرت فيها لو صار فيها شي والا ماتت والا فطست والا مرضت كيف باعيش من دونها حسيت اني مقدر اعيش من دون الثنتين مع بعض .. مشكله التعدد والله .. وانا اقول نصيحة اخيره اللي مو قد التعدد لا يعدد ههههه

اي مستجدات عالجوال راح اكتبها لكم هنا .. واذا بتشترون من نفس المحل قولوا ترى هذي دعاية من وحدة اسمها نجلاء مشهرتبك عند الله وخلقه هههههه

والله يا اني معجبة في الصين واهل الصين ياناس .. حق من يروح يبوس راسهم .. ممكن واحد بالنيابة مو كل الشعب .. عز الله ودعت الحياة ولا خلصتهم .

Advertisements
التصنيفات :الكترونيات
  1. IClassicy
    ديسمبر 2, 2009 عند 11:46 م

    صباح الخير

    القصة جدا مؤثرة لدرجة انا تفاعلت مع القصة

    مبروك عليك الجهاز الجديد ويعطيكي خيره ويكفيكي شره
    تقبلي مروري

    • ديسمبر 8, 2009 عند 2:58 ص

      شفت كيف القصة الحزينة هههههه

      الله يبارك فيك يارب .. آمين يااارب 🙂

      شكرا على طلتك ومرورك 🙂

  2. ديسمبر 6, 2009 عند 11:27 ص

    :”) صراحة قصة حزينة وعجيبة

    بس حلو الجوال الايبد دا هل في منو لون ولادي مع أنو عندي كل أنواع الايبد من الشفل الى التتش بس هذا الوع ما عندي !!! ودي أغير وجوالي ما يحتاج بس أبغى اجرب الصيني مدام سعرو رخيص والى مخوفني اكثر سمعت او يسبب امراض نتيجة الترددات القوية الصادرة عن الجوال ؟؟

    • ديسمبر 8, 2009 عند 3:01 ص

      ايوا في منو الوان على ما اذكر بس الابيض كمان ولادي وحلو والا مو

      اذا تردد واشعة وهالكلام لا هنا ستوب .. انا بصراحة احذر من هالشي لدرجة اني اكره اكلم في الجوال على اذني وقت طويل يا سماعات يا بلاشي .. اممم .. ممكن اخليه ايبود بس اني انزل منه الشريحة وخلاص ^_^

      تشكرات عالمعلومة .. وبرضو الواحد ياخذ حذره 🙂

      حياك الله 🙂

  3. أنس
    سبتمبر 9, 2010 عند 7:33 ص

    انا قصتي مع K850i مؤلمة
    والله أكثر جوال عشقته في حياتي
    انخرب اللمس حقه مرتين في خلال السنة أو السنة والنص الأولى
    وبدها ماشاء الله الجوال زي الفل
    ولكن قبل شهر فجأة الفلاش طرطع وتسبب في إنه اللمس ما يشتغل
    ولمن وديته أكسيوم قالولي ما يتصلح
    أحد عنده حل بالله

    • سبتمبر 11, 2010 عند 12:46 ص

      اهلين اخ انس .. من جد هالجوال ينحب .. ما اعرف الحل ما قد صادفتني هالمشكلة بس اكسيوم دايما يقولون انه ما يصلح ما يصلح او يخربونه اكثر من اول .. جوالي الى الان عندي وزي الفل مافيه ولا مشكلة ولا كأنه شرب موية البحر 😀

  1. No trackbacks yet.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: